Galicia acadou máximos históricos en venda de entradas de música

A recuperación económica do sector da música en vivo no pasado ano é un feito indiscutible que vai máis aló da superación dos efectos da pandemia e acada marcas históricas amosando un "efecto rebote" contundente. Ese é o resultado extraído dos datos publicados onte no Anuario de la Música en Vivo 2023 da Asociación de Promotores Musicales, que amosa un aumento nas vendas de entradas para música en directo en todo o Estado ata cifras nunca antes vistas , un feito que tamén é aplicable aos resultados galegos que se sitúan por riba da media española.

Segundo este informe anual, a cifra de facturación por venda de entradas no sector estatal foi a máis alta xamais rexistrada, chegando aos 459.248.129 euros, isto supón un incremento do 191,33% respecto ao ano 2021, no que o sector estaba aínda lastrado polas restricións sanitarias da pandemia, pero tamén é un incremento importante do 20,03% respecto ao ano 2019 a nivel estatal. No relativo a Galicia, o Anuario amosa uns resultados por riba desta media estatal e tamén unha marca histórica. Galicia aparece como a quinta Comunidade Autónoma do Estado en cifras, cunha facturación por venda de entradas que chegou ata os 22.120.923 euros en 2022, o que supón un considerable incremento do 161,15 % respecto aos 8.470.525euros de facturación neta rexistrados en 2021, pero un crecemento superior ao estatal respecto á situación pre-pandémica, xa que en 2019 se facturaron 16.834.234 euros, o que revela un incremento nese lapso do 31,4 %.

O Anuario da APM recolle tamén as cifras de asistencia dos meirandes festivais de España, na súa lista dos 10 principais hai dúas presenzas galegas: Resurrection Fest e O Son do Camiño. Respecto ao festival de Viveiro, que está no sétimo posto da lista dos macrofestivais, dise que congregou a 145.000 persoas, o que supón un incremento do 40% respecto da última edición completa de 2019. Sobre O Son do Camiño, do que se lembra o accidente co seu escenario aos poucos días do seu comezo, o Anuario asegura que tivo ata 115.000 asistentes, o que sería un 15% máis que en 2019.