Fíllas de Cassandra enfía en 'Acrópole' mitoloxía grega con trad e electrónica

As viguesas María Pérez (1996) e Sara Faro (2001) son Fillas de Cassandra, un proxecto musical que toma coma referencia o mito de Cassandra, muller á que se lle negou á voz, e lembran que elas son porque antes houbo quen loitou, quen deu vida. É así como nace Fillas de Cassandra, que agora presenta en directo o seu primeiro disco, "Acrópole", este sábado, 4 de marzo, a partir das 21.00h na Sala Capitol de Santiago de Compostela. A voz, as percusións, o piano e os sintetizadores son os fíos cos que o dúo tece as súas composicións, que beben tanto da música e das coplas tradicionais coma da música clásica o do pop, e que agroman dun xeito natural acompañadas dunhas contundentes bases electrónicas.

'Acrópole' é un álbum conceptual no que Fillas de Cassanda viaxa polos textos clásicos para poñer en relación ás personaxes da mitoloxía grega co mundo actual, ao que devolven unha ollada feminista e contemporánea a través da música. O traballo, producido por Berto e publicado da man de Tremendo Audiovisual, fía a súa narración a través de oito relatos actuais que asocian ás figuras de Antígona, Cassandra, Dafne, Eco, Pandora, Syrinx ou mesmo Lisístrata. No seu directo, no que o dúo contará coas colaboracións especiais de Berto, Mondra e algunha outra sorpresa, Fillas de Cassandra trasladará o relato do álbum ao escenarios. O concerto terá unha fonda carga teatral, no que presentarán unha proposta moi narrativa, ao igual que o seu disco. "Queremos que a Capitol se transforme nunha acrópole", afirma o dúo. Desde ese mesmo día, ademais, o novo disco poderase adquirir fisicamente tanto na propia sala coma en tendas especializadas, aínda que o álbum está dispoñible desde o pasado 24 de febreiro nas principais plataformas dixitais. O concerto servirá ademais para dar a coñecer a nova cooperativa cultural musical Nave de Lata, conformada polas promotoras Luneda Producións e Tremendo Audiovisual.O dúo xa ten previstas outras actuacións para prsentar 'Acrópole' no marco do Festival EmigraSon en Bruxelas o 25 de marzo, tras diso estarán no Lubicán de Lugo o día 30.