O pioneiro do cinema José Gil protagoniza un programa divulgativo

Co título José Gil. Pontevedra, provincia de cine. Na orixe do cinema é o programa co que a Deputación de Pontevedra, en colaboración con Vía Láctea Films, Cine na Rúa e Editorial Galaxia, queren dar a coñecer o traballo deste pioneiro galego da sétima arte. Presentacións, exposicións, proxeccións, concertos e outras actividades percorrerán unha trintena de concellos da provincia entre este mes de febreiro e o vindeiro decembro.

As Neves estrea, na fin de semana do 24 e 25 de febreiro, o programa que achegará a cada unha das localidades previstas un Cinemóbil no que unha exposición abordará a vida e obra do cineasta e fotógrafo en 16 paneis explicativos. Proxeccións de documentais, curtametraxes e montaxes con Gil de protagonista, presentacións da biografía que sobre el escribiu Manuel González ou sesións vermú con bandas locais a interpretar temas vencellados a esta figura fan parte da proposta.

Tamén se desenvolverán no marco desta iniciativa proxeccións das obras cinematográficas que se conservan de Gil, un documental de 55 minutos de Miguel A. Romero sobre o cineasta e ata unha curta cómica de Harold Lloyd que proxectaba o este pioneiro na súa época. O proxecto inclúe tamén encontros coa comunidade educativa de cada localidade e unha páxina web específica sobre o homenaxeado e o proxecto.

O programa finalizará na primeira fin de semana de decembro en Ponteareas, logo de pasar por Cuntis, Cambados, A Guarda, Caldas, Mondariz, O Grove, Poio, Baiona, Redondela, Gondomar, Nigrán, Arbo, Mondariz-Balneario, Soutomaior, O Porriño, Bueu, Cangas, Pontecesures, Lalín, Sanxenxo, Pontevedra, Tui, Vigo, Covelo, Moaña, Salvaterra, Marín e Vilagarcía.