Nace Un país de festas e ritos para transmitir as celebracións do ciclo anual

Este programa do Concello de Pontevedra inclúe dezaseis citas para público familiar

Este programa do Concello de Pontevedra inclúe dezaseis citas para público familiar
Imaxe sobre a Candeloria de Un país de festas e ritos. Fonte: Concello de Pontevedra.
Este 5 de febreiro na Illa de Medal, en Ponte Sampaio, unha actividade daba a coñecer ao público máis novo as tradicións das celebracións ígneas do inverno, como os fachóns e a Candeloria, nas que o lume é protagonista. A proposta era primeira sesión do programa Un país de festas e ritos, co que o Concello de Pontevedra quere transmitir ás novas xeracións das celebracións do ciclo anual e que se integra no proxecto Apego.

Artellada en dezaseis citas que se repartirán ao longo de 2016, quince nas parroquias do concello e unha máis na propia cidade, esta proposta do Servizo de Normalización Lingüística propón sesións de 90 minutos que esixen inscrición previa. En cada un destes encontros realizarase unha charla didáctica a cargo do antropólogo Rafael Quintía, de Ab Origine, sobre a festa correspondente, que se poderá completar, segundo o caso cun percorrido interpretativo pola contorna da actividade. Canda a isto, haberá unha sesión de contacontos e un obradoiro de debuxo sobre o tema tratado da man de Polo Correo do Vento.

A seguinte cita, centrada no Entroido, desenvolverase o vindeiro 12 de febreiro no Monte da Facha, e en vindeiros meses abordaranse tradicións como Os ritos de comensalidade (5 de marzo), a romaría de San Cibrán (25 de marzo), a Semana santa e a súa relación con plantas máxicas, lume novo e augas milagreiras (15 de abril), os maios (29 de abril), o Corpus (27 de maio), San Xoán (10 de xuño), a romaría de San Bieito (1 de xullo), o mito de Santiago en Pontevedra (22 de xullo), os seráns (23 de setembro), a festa de defuntos (28 de outubro), a matanza (4 de novembro), o magosto (25 de novembro), os mitos e crenzas do Nadal (16 de decembro) e os ritos e tradicións desta festa (17 de decembro).