Está xa dispoñible na rede o mapa do proxecto Descubre Leyendas. Esta investigación, que se desenvolve no seo da Universidade Complutense, recolle e xeolocaliza lendas recollidas en guías de viaxe, dicionarios xeográficos e relatos publicados na prensa estatal do século XIX.
Dentro destas, o proxecto compila unha corentena de lendas do noso país, segundo recolle o web GCiencia, con elementos como a Compaña, a Torre de Hércules, o Castelo de Sobroso, Santo André de Teixido ou Santa Liberata entre outras. En total recóllense catorce lendas tanto en Pontevedra como na Coruña, sete en Lugo e cinco en Ourense.
A presentación desta iniciativa explica que "o século XIX é, como ningunha outra época, o grande momento de recuperación e transformación cultural dos elementos folclóricos". Ao ver da coordinación do proxecto, "a localización das mellores versións dos diferentes relatos lendarios pode contribuír a recuperar as tradicións locais, matizadas polo imaxinario rexionalista ou nacionalista da época, e colaborar na sustentabilidade do patrimonio inmaterial español".
