O encastelamento na Galicia medieval. Fonte: Mazarelos
Dicía Otero Pedrayo que comezou a tomar conciencia de Galicia a partir da visión do mapa de Galicia elaborado por Domingo Fontán. Seguindo esa idea de que un territorio se fai tanxible a partir dos mapas, a cooperativa Mazarelos, responsable tamén da revista homónima de divulgación histórica, presentou un web no que se poden descargar de xeito gratuíto diferentes mapas que amosan diferentes realidades do reino medieval de Galicia. Desde a máis antiga división do reino a partir do Concilio de Lugo ata a dispersión dos castelos, o monacato ou as sete provincias. Os mapas tamén explican procesos históricos máis dilatados, como a mobilidade das mulleres da aristocracia galega, a produción e comercio do viño, o reino no comercio marítico europeo. O proxecto foi feito ao abeiro do Fondo de proxectos do reino de Galicia da Deputación da Coruña.
