Oito festivais galegos aspiran aos premios europeos

O vindeiro 18 de xaneiro descubriranse cales son os mellores festivais de Europa coa decisión final do xurado da XIIª edición do Eurpean festival Awards. Arestora está aberta a votación popular para acadar un posto finalista nas diferentes categorías que contemplan este galardóns da industria musical. Desde fai varias edicións hai un número variable de representación galega a estes premios e tamén algún deles foi finalmente galardoado, como foi o caso do festival WOS pola súa edición de 2018 que acadou o premio a mellor festival realizado en espazos baixo teito. Este ano, son oito os festivais realizados en Galicia durante 2022 que buscan algún destes premios e que agora mesmo poden ser votados en ata catro categorías. Na distribución territorial tres dos festivais que representan a Galicia son da provincia da Coruña (dous deles de Santiago de Compostela), outros tres da de Pontevedra e dous da provincia de Lugo.

O WOS Estrella Galicia da capital galega recunca na categoría de Mellor Festival baixo teito (indoor en inglés) que xa acadou anteriormente. Ademais del a categoría na que máis festivais galegos entran a competir, mesmo entre si, é a de Mellor festival de Tamaño medio, o que inclúe aqueles eventos de entre 10.000 e 39.999 asistentes ao día. As edicións deste ano do festival Portamérica de Caldas /Portas; o Resurrection Fest de Viveiro; o Caudal Fest de Lugo e o Morriña Festival da Coruña entran nesa lista de eventos a votar. Na categoría de Grandes Festivais (aqueles cunha capacidade diaria por riba dos 40.000 asistentes) o festival O Son do Camiño de Santiago entra a competir por vez primeira grazas ás modificacións levadas a cabo no recinto do Monte do Gozo de Santiago. Dous eventos de nova creación neste 2022, o festival Latitudes de Vigo e o Río Verbena de Pontevedra competirán con outros festivais europeos e entre si polo premio a Mellor Novo Festival.