A feira de discográficas independentes crece na súa segunda edición

Co magnífico sabor de boca deixado pola primeira edición, celebrada o pasado ano, volve a presentarse na Coruña DISKE DISCO, a feira que reúne aos selos discográficos independentes de Galicia. O evento organizado pola Asociación Cultural DISTANT SOUNDS preséntase en crecemento paseniño pero firme, engadindo novas actividades ao encontro coas discográficas e a súa produción, que terá lugar o vindeiro día 19 de novembro de novo nas instalacións da Fundación Luis Seoane. Alí reuniranse unha ducia de selos galegos autoxestionados que, ademais de amosar e poñer á venda as súas publicacións e produtos, presentarán showcases, charlas e sesións Dj. Ferror Records, Ernie Records, DISCTRL, La Familia Revolucion, Uterzine, Sounds Like Sunday, Radix Records, CGTH, Paf Bum !!!Discos, El Beasto, Freeky Dicky, Medusa´s Lair Records son os selos ata agora confirmados para esta segunda edición



O encontro pretende un ano máis servir como escaparate para estas iniciativas tan importantes para un sistema musical san como complicadas, que son a creación e mantemento dos selos discográficos independentes, pequenas empresas onde a paixón pola música e o respecto á calidade está case sempre por riba de outras consideracións comerciais. Ademais o DISKE DISCO busca tamén apoiar a escena musical galega máis alá dos circuítos máis comerciais e masivos. No que é a extensión de programa desta segunda edición, comezou oficialmente o pasado día 8 de outubro, coa presentación da BSO da pelíucla de animación de Fermín Muguruza película "Black Is Beltza 2" e da banda deseñada da que parte. Outras das actividades engadidas terá lugar o venres 18 de novembro, onde en colaboración coa AC República Mardigras a sala do mesmo nome acollerá o concerto da banda Sandford Music Factory que adiantará temas do seu próximo lanzamento con Radix Records.