Unha xornada en Oleiros abordará a importancia dos arquivos fotográficos

A mesturar formación técnica cun repaso histórico por fitos e nomes relevantes da fotografía galega, a Deputación da Coruña celebra os vindeiros 11 e 12 de novembro as xornadas A fotografía nas coleccións locais. Segundo explica a presentación da iniciativa, as institucións "atesouran grandes cantidades de fotografías que reflicten a realidade dun territorio, dun pobo ou mesmo da institución que as garda", pero advirte que "para o seu uso como documento histórico relevante, susceptible de ser estudado, é preciso dispoñer dun axeitado tratamento documental".

No programa haberá un repaso da situación actual da fotografía no noso país da man de Vítor Vaqueiro, unha presentación do traballo dos fotógrafos históricos da Costa da Morte R. Caamaño e J. Vidal e mais unha introdución ao labor de Anna Turbau e ao papel das mulleres na fotografía contemporánea galega.

Canda a isto, varias mesas amosarán experiencias en marcha sobre canles de difusión da fotografía na que se abordarán iniciativas como premio Luís Ksado ou o Festival FFoco. Tamén se amosarán diferentes propostas que empregan a fotografía como expresión da memoria ou que desenvolven as súas posibilidades como expresión da identidade local.

Ademais, o programa inclúe propostas formativas dedicadas a pautas para unha boa xestión dos fondos e coleccións fotográficas e a xestión da imaxe dixital. A iniciativa, que se desenvolverá no centro cultural A Fábrica, de Oleiros, poderá seguirse en rede.