Escavar un castro sen mover un centímetro de terra

Existe unha crenza popular de que o único xeito de coñecer e poñer en valor un xacemento castrexo é a partir da súa escavación. Pero o uso de tecnoloxías non invasivas para poder 'ver' baixo o subsolo é cada vez máis frecuente, e permite obter datos relevantes sobre os sitios. Agora, un novo proxecto de investigación tentará refinar e mellorar as técnicas de obtención de datos sobre os castros a través de todo tipo de tecnoloxías non invasivas, como gradiómetros, xeorradares ou mesmo, de xeito máis experimental, novas sensóricas instaladas en drones. O proxecto vaise levar a cabo nun promontorio fortificado na costa de Cervo, na Mariña luguesa. O castro de Rueta, xa limpo a semana pasada antes da toma de datos, amosa un excepcional estado de conservación, con varios recintos fortificados, alteracións no terreo que poderían corresponder a estruturas e unha importante parcela no exterior á que tamén se estenderán as investigacións. Os traballos, dirixidos polos arqueólogos David González-Álvarez (Instituto de Ciencias do Patrimonio) e Jesús García Sánchez (Intituto de Arqueoloxía de Mérida) do CSIC, servirán para obter a máxima información sobre o castro e as súas afeccións antes de recurrir a técnicas máis convencionais na arqueoloxía, así como testar metodoloxías de traballo que supoñen a escavación e, polo tanto, a destrución de parte do rexistro arqueolóxico conservado.