Chega ás librarías o Cosmic Detective de David Rubín

De xeito case paralelo á súa edición en inglés, está a chegar ás librarías do estado a versión en español de Cosmic Detective, a última obra do ourensán David Rubín. Astiberri edicións corre co lanzamento desta obra, que conta con guión dos recoñecidos Jeff Lemire e Matt Kindt.

O volume, de 192 páxinas, narra unha historia de xénero negro na que o protagonista investiga o asasinato dunha deidade cósmica. A realización desta obra financiouse mediante unha campaña de crowdfunding na que os tres autores conseguiron 170.000 dólares fronte aos 35.000 que tiñan como obxectivo inicial.

De xeito paralelo, Demo Editorial leva aos andeis das librarías a edición en galego de Black is Beltza. Ainhoa. Esta novela gráfica con guión de Fermín Muguruza, Harkaitz Cano e Isa Campo e debuxo de Susanna Martín. A obra, que sae en paralelo ao filme de animación do mesmo título, repasa en 128 páxinas a vida da protagonista que lle dá título. A partir dunha trama de investigación, o volume fai un percorrido polos movementos revolucionarios do mundo nos anos 80.