O barrio da Magdalena de Ferrol acolle entre os días 10 e 15 de outubro a sexta edición do festival de artes escénicas Fóra do Mapa. O programa céntrase en pezas de carácter contemporáneo a combinar as artes escénicas con espazos patrimoniais. Obradoiros, actividade de rúa e teatro e danza atópanse nesta iniciativa.
Santiago Sánchez abre o festival o día 10 cun obradoiro que se desenvolve ata o día 13. Marc Caellas e David G. Torres inician o programa escénico o día 11 con Suicide Notes. O 12 serán La Soledad con El paseo de Robert Walser e Diego Anido con O deus do pop quen protagonicen a xornada.
As sesións de teatro miúdo contarán con propostas breves a cargo das compañías Bea García e Desiree Privado, Nelu Vermouth, Microefectos Dramatúrxicos, Melania Cruz, Iago García e Hermanas Gestring, que tamén levarán a escena Adora a las hermanas Gestring. Cristina Blanco fechará o festival con Grandissima Ilusione o vindeiro sábado 15 no Teatro Jofre.
