A sétima edición do congreso internacional Fugas e Interferencias volta para analizar as últimas tendencias internacionais no campo da performance artística. Unha vintena de especialistas vidos de cinco países reúnense neste encontro anual que organizan a Universidade de Vigo e o Centro Galego de Arte Contemporánea entre os días 16 e 18 de setembro coa súa sede repartida entre a Casa das Campás Pontevedra e a sede do CGAC en Compostela.
Segundo explica a organización, o encontro achegará "reflexións teóricas sobre a historiografía da arte de acción, as posibilidades da performance como elemento pedagóxico, as interrelacións entre esta disciplina e a danza conceptual ou o seu uso no activismo cultural, político e de xénero".
Nas seis mesas que fan parte do programa abordaranse "aspectos de activismo cultural, político e de xénero, reflexións teóricas sobre a historiografía da arte de acción ou aspectos filosóficos que poñen en cuestión a ideoloxía das narrativas documentais", ademais de tratar a acción como obxecto e como dispositivo pedagóxico, e de atender á interrelación coas artes escénicas experimentais no ámbito sonoro ou en relación coa arte conceptual, sinala a organización.
Ademais de reflexións teóricas, a cita conta no seu programa coa presentación de dúas performances o día 16 a cargo do Colectivo Refugallo e Yolanda Herranz.
