O VII Titiriberia recupera a súa dimensión internacional

Cun programa ampliado a trinta compañías e o retorno de propostas internacionais ao seu cartel, o festival Titiriberia volta a Rianxo entre os días 24 e 31 de xullo. Entre as propostas convidadas destaca a mestra napolitana Irene Vecchia, que achegará a tradición dos guaratelle en varias actuacións e nun curso. A compañía Títeres desde Abajo, cunha reflexión sobre as folgas ou a andaluza Trastero 203, que fai unha relectura feminista do mito de Eva, protagonizan canda a ela as funcións de pago no auditorio da vila.

Tamén se celebrará, no marco destas funcións de pago, unha nova edición do espectáculo de produción propia As varietés do Barriga Verde a integrar música ao vivo, clown, teatro, títeres e outras formas artísticas en ambiente de cabaré.

O resto das funcións serán de balde en espazos públicos da vila de das parroquias do concello. Entre elas, o desfile de cabezudos con música que abre o programa o día 24 ou o traballo dos portugueses Mandrágora, que achegarán os tradicionais robertos, parentes próximos do Barriga Verde galego, canda unha grande instalación interactiva nas rúas da vila.

Destaca no programa a alta presenza de artistas femininas e de propostas dedicadas a revisar a relacións de xénero. Así, haberá montaxes nesta liña da man de A Xanela do Maxín, Carmen Domech ou A Cova das Letras a mesturar títeres e contos, ademais dnha conferencia sobre As mulleres na arte dos títeres da man da investigadora mexicana Elvia Mante. Fantoches Baj, Diáspora Teatro, Seisdedos Marionetas, Viravolta Títeres Trécola Produccións ou Os Monicreques de Kukas fan tamén parte da representación galega no encontro.

A proposta contará coa presenza do especialista catalán en títeres Toni Rumbau, que actuará como espectador cómplice a dinamizar debates e charlas, a interactuar coas compañías e a facer análises sobre as montaxes presentadas. Haberá ademais encontros postfunción para coñecer as interioridades de diferentes espectáculos e obradoiros para que o público máis novo saiba como crear e manexar os seus propios títeres.

Varias exposicións, a incluír unha de títeres nos escaparates da vila, concursos ou unha mesa redonda sobre 40 anos de títeres en Galicia fan parte desta iniciativa que promove a Asociación Morreu o Demo co apoio da Agadic, a Deputación da Coruña e o Concello de Rianxo.