Un volume reivindica o traballo poético de Manuel García Barros

O Concello da Estrada acollía este 15 de xuño a presentación de Sonoridade das auras. Poesía reunida. Esta obra publicada pola editorial Galaxia recolle a totalidade da produción poética de Manuel García Barros. O estradense, coñecido sobre todo polo seu labor como narrador e xornalista, iniciou na lírica a súa carreira literaria.

O volume achega "pezas moi rítmicas, con omnipresenza da natureza, un verdadeiro hilozoísmo, e cunha variada galería de temáticas que van das composicións de circunstancias e festivas, ata as amorosas, sobre a morte, a identificación coa Terra e a loita pola dignidade dos labregos, sen esquecer o seu lado combativo contra o caciquismo e as diferenzas sociais", segundo explica a presentación editorial.

Carlos Loureiro Rodríguez e Xesús Domínguez Dono corren coa edición da obra, que recupera pezas inéditas do autor canda a textos espallados ata o momento en xornais e revistas. A compilación "permite, a quen ao autor de Berres se queira achegar, ter unha visión de conxunto da súa obra poética. Un elo, máis que necesario, para que García Barros pase a ocupar o lugar reservado para a súa obra e a súa figura nas letras galegas", segundo adianta a presentación.

O autor, coñecido co pseudónimo Ken Keirades, viu publicados tamén da man de Galaxia un volume con ensaios inéditos en 2019, e outro a compilar traballos xornalísticos realizados entre 1901-1963 no ano a seguir.