O secretario xeral de Política Lingüística, Valentín García, presentaba este 30 de maio a nova sección coa que contará o Centro Ramón Piñeiro para a investigación en humanidades. A área centrarase nos estudos históricos e sociais, en particular dedicados a "todo o relativo ao tempo histórico do intelectual" que dá nome ao centro, segundo sinalou García.
O historiador Amancio Liñares Giraut será o responsable de coordinar esta nova área, que para García vai "complementar as investigacións que no eido da lingüística e a literatura galegas se desenvolven no centro". Así a actividade artellarase en "dúas cuestións diferentes e complementarias: Ramón Piñeiro e o seu tempo (Da nosa acordanza) e Historia Contemporánea de Galicia (Olladas no pasado)".
Segundo explica a información da Xunta "este marco cronolóxico acompaña a propia traxectoria vital do escritor, que discorre case no que foi a totalidade do pasado século XX. Trátase de ampliar e optimizar o labor do centro, poñendo o foco neste período dentro das súas actividades, estendéndoo a máis áreas vinculadas coas Humanidades e a cultura galega, facendo medrar e diversificar o seu campo de actuación".
Entre as propostas concretas que desenvolverá este departamento estará "a publicación de obras do eido histórico, a organización de xornadas e outras valiosas iniciativas".
