Astarot presentan o álbum 'Baixo a luz de Breogán'

A banda de Cangas celebra os seus 39 anos cun disco que homenaxea á literatura en galego

'Astarot' levan trinta e nove anos facendo rock, e incorporaron a lingua e a cultura galega ás súas gravacións no seu terceiro traballo "Apuesta y gana" (1996), dende entón sempre foron xa un referente do rock en galego, con temas novos ou incorporando cancións populares ás sonoridades do rock metal. Neste aniversario importante a banda de Cangas do Morrazo presenta o seu noveno disco 'Baixo a luz de Breogán' (RockCd Records). O álbum contén 14 cancións, algunhas delas son cancións propias e outras melodías creadas con letras de destacados autores e escritores que compuxeron en lingua galega. Neste traballo Astarot segue os pasos dos seus anteriores traballos, pero fusionando aínda máis o son do rock con melodías celtas, para o que contaron coa colaboración de músicos como Bieito Romero e Xan Cerqueiro. Con 'Baixo a Luz de Breogán' a banda quixo render homenaxe a autores que marcaron a literatura en lingua galega como Rosalía de Castro, Xela Arias, Federico García Lorca ou Celso Emilio Ferreiro, entre outros.



Como preludio desta estrea, a banda presentou os videoclips 'Negro Caravel', ambientado no poema de Rosalía de Castro que se inclúe na súa obra 'Cantares Gallegos', e a lírica do vídeo 'Chove en Santiago', a súa versión de melódico rock, que combinou coa música tradicional galega, dende o romance que Federico García Lorca dedicou á cidade de Santiago de Compostela. Ademais o vídeo do tema 'Camariñas' presentouse en You Tube coincidindo co aniversario da banda. Durante este ano a banda fará unha xira co seu espectáculo , 'Astarot, a lenda viva do rock galego' no que repasará as cancións clásicas galegas na súa discografía destas case catro décadas. Astarot está formado por Juan A. Antepazo (voz principal), Carlos Gandón (guitarras e voz), Loren Tevra (guitarras e voz), Carlos Rodal (baixo), e José M. Piedra (batería).