Localizan un acocho de máis de 50 moedas romanas nunha cova de Triacastela

Un conxunto de máis de cincuenta moedas romanas foi descuberto na Cova das Cabras (Triacastela), unha cavidade próxima á Cova Eirós. As moedas foron localizadas durante a intervención arqueolóxica levada a cabo na cova por parte dos arqueólogos do Grupo de Estudos para a Prehistoria do Noroeste da USC e un equipo da universidade de Tarragona, dentro do proxecto de Cova Eirós. As moedas foron identificadas polo arqueólogo Santiago Ferrer como follis de Bronce, acuñadas ao longo do século IV. O achado súmase así aos numerosos acubillos con tesouriños de moedas localizados no noroeste peninsular durante a Antigüidade Tardía. Eses acubillos reflicten un ambiente de conflitividade social no que as persoas gardaban as súas pertenzas en lugares aillados ou pouco visibles para evitar o seu roubo. Os investigadores tamén atoparon na entrada da cova testemuñas do uso medieval dese espazo como curral, como osos de cabras e ovellas datados entre os séculos XII ou XIII ou cerámica medieval.