Enrique Labarta Pose
O Concello de Zas acollía este sábado 12 de marzo a presentación do Roteiro Enrique Labarta Pose, que convida a coñecer a Costa da Morte a través de vinte e un espazos vencellados a este autor. Concello e Consello da Cultura Galega promoven este percorrido, que está dispoñible na rede con abondosa información sobre todas as etapas.
Segundo explica a presentación do proxecto, o roteiro propón "unha viaxe que nos leva a aqueles espazos que inspiraron ao escritor baiés para escribir moitas das súas poesías e dos seus contos". A partir do Centro Sociocultural de Baio, onde se pode ver unha exposición permanente sobre o autor, o percorrido transcorre polos concellos de Zas, Vimianzo, Camariñas, Coristanco, Cabana de Bergantiños, Corcubión, Carballo e Muxía. Nas paradas poden atoparse "igrexas, pedras máxicas, pontes antigas, patrimonio etnográfico, pazos, impoñentes faros e praias" vencelladas á obra literaria de Labarta, así como lugares que fan parte da propia biografía do autor.
Labarta Pose, nado en Baio en 1863, foi coñecido como o Quevedo Galego e desenvolveu un importante traballo en galego e castelán marcado polo seu emprego do humor. Cultivou narrativa, poesía e teatro, ademais de promover publicacións como Galicia Humorística (1888), La Pequeña Patria (1890), Extracto de Literatura (1893), Pasatiempos (1894) ou a recoñecida Galicia Moderna (1897), ademais de ser un dos pioneiros da fotografía no noso país.
