Milán, 1969. Un anarquista falece tras caer pola ventá dunha comisaría na que está sendo interrogado pola policía. En plena investigación xudicial dos feitos, a aparición en dita comisaría dun "tolo" que se fai pasar por diferentes personaxes logrará darlle a volta ás indagacións e descubrir a verdade. Esa é a sinopse de 'Morte accidental dun anarquista', a obra de Dario Fo que Candido Pazó adapta e dirixe para Talía Teatro e que se estreará este venres no Teatro Principal de Santiago. Pazó duplica a súa presenza na rúa dos teatros compostelá, mantendo en cartel a poucos metros a adaptación de 'A Peste' de Albert Camus para o CDG no Salón Teatro. Con esta sátira implacable de Fo, Cándido Pazó adapata ao galego a outro dos grandes clásicos do teatro contemporáneo.
Toño Casais, Dani Trillo, Xurxo Barcala, Rubén Prieto, Artur Trillo, Diego Rey, Marta Ríos conforman o elenco sobre o escenario que traslada a disparatada e reflexiva comedia coa que o autor italiano puxo en evidencia fai 50 anos a natureza da policía, os seus métodos manipuladores e a súa función represora, así como o importante papel dos medios de comunicación na súa busca da noticia e do escándalo. A obra estréase este venres, 11 de marzo, ás 20:30 contando ese día cun encontro "posfunción" ao remate do espectáculo. A obra representarase o sábado á mesma hora no mesmo espazo. Tras diso está prevista unha xira da produción que comezará o día 25 de marzo pola Casa da Cultura de Boiro e o día 26 estará en Cee, inicialmente.
