Lalín querélase contra Vila de Cruces pola desaparición de parte do legado do xeólogo Hilgen

En 2008, os familiares do xeólogo holandés Jan Dirk Hilgen doaron boa parte do seu legado ao concello de Lalín. Este científico foi un namorado da Galicia occidental e da serra do Candán. O legado estaba composto por un gran volume de fotografías (1.532), libros, diapositivas, instrumentos ópticos, correspondencia e unha importante colección de 51 mapas. En 2008, o concello de Lalín cedeu temporalmente este legado, a través dun convenio de cesión temporal, para o Museo da Minería de Fontao que ía abrir nas minas do mesmo nome no concello de Vila de Cruces. Tras o fracaso da apertura do museo, o material volveu a Lalín en 2018 para ser incorporado ao Pazo de Liñares, onde se atopa na actualidade. Pero faltaban os 51 mapas, que non foron localizados no Museo da Minería de Fontao nin noutras dependencias municipais. O situación deu lugar a escritos e declaracións do concello de Lalín e un dos principais defensores do legado de Hilgen, o xeógrafo Antonio Presas, quen chegou a recorrer á Valedora do Pobo para solicitar a entrega destes materiais. Onte, o concello de Lalín anunciou a interposición dunha querela xudicial contra o concello de Vila de Cruces polo incumprimento do convenio e solicitar o retorno destes documentos a Lalín.