Unha das novas salas do Museo do Pobo
Coa presenza do presidente da Xunta, o Museo do Pobo Galego inauguraba este 25 de xaneiro as súas novas salas dedicadas á Historia do noso país. Estes espazos recollen 64 pezas que abranguen desde o Paleolítico ata o Reino Suevo, a atender a época castrexa e a romanización. Entre o material exposto atópanse dúas esculturas castrexas, machadas neolíticas, un petróglifo ou a maqueta dunha mámoa.
As salas inauguradas supoñen a primeira fase da sección dedicada á Historia de Galicia no Museo, que contou cun investimento de 3,4 millóns de euros do Consorcio de Santiago e outros 150.000 da Deputación da Coruña. Para o vindeiro verán está prevista a apertura dos espazos dedicados ao Medievo galego e no prazo de dous anos agárdase ter completadas todas as salas de carácter histórico.
A exposición permanente das novas salas inclúe material audiovisual, pezas musicais compostas por Abe Rábade e achegas procedentes doutros museos e de coleccións particulares. Entre as pezas destacadas que xa se poden ver no centro está o material recuperado do dolmen de Argalo, en Noia, unha agulla de óso atopada en Punta Atalaia ou un vidro aparecido na Cidaella de Sobrado dos Monxes.
