Uxío Novoneyra regresa este venres ao Courel

O poeta do Courel regresa mañá á terra onde sempre quixo descansar. Este venres, 14 de xaneiro, ás 09:30 horas da mañá terá lugar o traslado dos restos do poeta Uxío Novoneyra dende o cemiterio de San Froilán, en Lugo, á casa-museo no Courel onde está a súa Fundación. Este traslado, por iniciativa da familia, responde á vontade que sempre tivo o escritor de ser soterrado alí, unha vontade que non se puido cumprir por múltiples motivos ata o de agora. O seu fillo e presidente da Fundación Novoneyra, Uxío, así o asegurou, "temos o sitio axeitado e os recursos para facelo agora e sempre foi a nosa idea ademais de ser unha demanda dos propios veciños da zona", afirma ademais de agradecer fondamente ao Concello de Lugo o acollemento dos restos que se fixo ata agora na capital provincial, coa que tantos lazos unen ao poeta e a súa familia.

O corpo do poeta foi soterrado en Lugo trala súa morte en 1999 xa coa intención de que estivera alí provisionalmente ata que fose posible o seu traslado ao lugar elixido polo autor para descansar o corpo na terra: o seu amado Courel. "En Lugo estaba nun lugar perfecto, descansando entre amigos, entre Ánxel Fole e Pimentel e outros moitos", explica Uxío, "alí o concello xa nos dixo que colocará tamén un memorial no seu recordo para lembrar que estivo alí durante máis de vinte anos", asegura. Xustamente o vindeiro mércores, 19 de xaneiro, cumprirase o 92 aniversario do nacemento de Novoneyra, unha coincidencia que resalta positivamente o fillo e presidente da Fundación que xestiona o seu legado.

Segundo comunicou o goberno local lugués, mañá, na entrada principal do Cemiterio de San Froilán (Lugo) farase un pequeno acto de despedida á saída dos restos fúnebres que consistirá na lectura dun poema e na interpretación do Himno Galego. Ao acto asistirán representantes do Goberno de Lugo xunto con integrantes dos distintos grupos da Corporación Municipal e Provincial. Tras diso os restos chegarán a un sitio moi especial na Fundación, repousando baixo un monumento memorial deseñado polo arquitecto Xosé Allegue, elaborado en pedra local e feito por canteiros do Courel, acompañado dunhas figuras en bronce do escultor Óscar Aldonza. Estará situado nun lugar preferencial, no centro da fachada principal e baixo o balcón central e ao seu redor plantaranse roseiras que o circunden.