
"A cidade de Buenos Aires foi, durante as seis primeiras décadas do século vinte, un centro de produción artística e intelectual galega plasmada na edición de boletíns asociativos, revistas e libros a través das entidades emigradas, exiliados e mecenas", explica a presentación da produción.
O documental, que se pode ver íntegro na rede, amosa o xeito en que o exilio galego achegou unha nova vaga intelectual e editorial. "Daniel Castelao e Rafael Dieste en Editorial Atlántida; Mariano Medina del Río e Álvaro de las Casas son os directores de Emecé, onde Luis Seoane, Arturo Cuadrado dirixirán as coleccións Dorna e Hórreo. Logo, en 1942 Seoane e Cuadrado fundan a Editorial Nova onde Lorenzo Varela e Manuel Colmeiro son os seus estreitos colaboradores", sinala o texto promocional.