Quiosco: Adra 16

Está xa dispoñible para descarga na rede e mais en formato físico o número 16 de Adra. A revista das socias e socios do Museo do Pobo Galego presenta neste mes de novembro un número monográfico "dirixido a poñer en evidencia a realidade das mulleres na contorna de ámbitos tan diferentes como os da prehistoria, a emigración, a sexualidade, o rural, a saúde mental, a literatura, o baile, as artes plásticas ou os museos".

O volume, que está á venda a un prezo de seis euros, conta con textos como o de Aurora Marco dedicado a As mulleres e a escrita, a análise de Ana Jesús López Díaz sobre a a situación das mulleres na universidade ou o repaso dos estereotipos sexistas na transmisión do baile tradicional galego a cargo de Carme Campo Martínez e Chus Caramés Agra. A relación de xénero e saúde mental da man de Lola Ferreiro Díaz, unha perspectiva sobre as prácticas museais arredor da muller por Mariám Mariño Costales e outra análise de Andrea Mouriño sobre a ollada masculina nos discursos museográficos fan parte da publicación, que conta con ilustracións de Mónica Montero.