Fotografías do Camiño Portugués protagonizan a nova exposición do Gaiás

O conselleiro de Cultura, Román Rodríguez inauguraba na tarde deste 27 de outubro no Museo Centro Gaiás O Camiño Portugués. Lembranzas de mar e pedra. A última grande exposición do ano da Cidade da Cultura explora esta ruta de peregrinación xacobea a través das imaxes de 42 fotógrafos e fotógrafas de diferentes épocas. O proxecto reúne un total 120 imaxes baixo o comisariado da historiadora, comisaria, guionista e documentalista Lucía Laín.

A nova exposición, que estará aberta ata o vindeiro 17 de abril, "retrata as realidades e paisaxes que conforman o itinerario do Camiño Portugués e tece un diálogo entre a fotografía do pasado e as olladas do presente". Paisaxes, a vida nas prazas das aldeas, monumentos e escenas cotiás de diferentes momentos da historia "volven ser motivo de inspiración baixo unha nova ollada", segundo explica a presentación do proxecto.

Na autorías da imaxes atópanse nomes históricos da arte fotográfica como Alberto Marçal Brandão, Artur Pastor, Aurélio da Paz dos Reis, Charles Alberty (LOTY), Emilio Biel e Companhia, Estúdios Tavares da Fonseca, Filippo Prosperi, Foto Guedes, Fotografia Alvão, Lda., Helga Schmidt-Glassner, Jaime Pacheco, Joaquín Pintos, José Gouveia Gomes Junior, José Moreira, José Suárez, Nicolás Muller, Octávio Lixa Filgueiras, e Otto Wunderlich.

A estes súmanse artistas da fotografía contemporánea como Antón Buciños, Blas González, Carla Andrade, Carmenchu Alemán, Eva Díez, Fernando Rey, Iñaki Matilla, Jesús Madriñán, Luis Borges, Juan Manuel Castro Prieto, Juan Rodríguez, Keila Pousa, Luis Otero, Luis Vioque, María Meseguer, Miguel Muñiz, Modesto Martínez, Nicolás Combarro, Roberto de la Torre, Tono Arias, Vari Caramés e Verónica Vicente.

A acompañar as imaxes atópanse textos de Luís de Camões, Miguel de Unamuno, José Augusto Vieira, Antonio da Costa, Catherine Gasquoine, Florbela Espança, Teodosio Vesteiro Torres, L. Conde de Rivera, Victoriano García Martí, Rosalía de Castro ou Emilia Pardo Bazán que convidan "a un exercicio de introspección co que sementar na memoria de cadaquén o seu propio relato do camiño".

Galería de fotografías presentes na exposición