O documental 'Negro Púrpura' chega ás salas de cine

Tras da súa proxección onte na xornada inaugural do Play-Doc de Tui, o filme documental "Negro púrpura", de Sabela Iglesias e Adriana P. Villanueva (Illa Bufarda), comeza hoxe a súa distribución en salas de cine comerciais e cine clubes. A película chegará inicialmente a oito localidades neste primeiro período de proxeccións, sumando sete salas de cine en Galicia, unha en Barcelona e o Cine Clube de Cangas.

O documental, rodado entre 2018 e 2020, realiza unha viaxe no tempo para contar a historia do fungo de propiedades alucinóxenas dos mil nomes (caruncho, cornecelo, dentón, cornello, grao de corvo, etc). Negro púrpura vai da sabedoría popular á ciencia, repasando a historia do cláviceps purpúrea e conectando Galicia co resto do mundo (relacionándose con multinacionais farmacéuticas, a CIA ou o nacemento do LSD) e alimenta relatos que nos son propios e nos tocan de preto, como o seu uso na medicina popular.



'Negro Púrpura' poderase ver en Santiago, no Cine Numax; en Ferrol, no Cine Dúplex; na Coruña proxectarase nas salas Cantones e Cines Yelmo Rosales; os Multicines Norte e o Cine Yelmo acollerán en Vigo pases deste documental, que tamén chegará a Lugo, no Cine Yelmo As Termas. Ademais diso en Barcelona o filme poderá verse ata o vindeiro día 30 na sala Zumzeig Cinecooperativa e o CineClub Cangas fará unha proxección o vindeiro día 27 de setembro. Tamén o Auditorio Municipal de Nigrán acollerá este sábado un pase da película.