O petróglifo ao carón dunha escorrentía. Foto: Bruno Novoa
No concello de Oia continúan a aparecer motivos rupestres vinculados a embarcacións. Desta volta, Bruno Novoa e Xurxo Salgado localizaron no monte Lousado, preto doutras estacións de arte rupestre e restos arqueolóxicos, unha gravura rupestre que representa unha embarcación, segundo un artigo publicado por Novoa en Historia de Galicia. O motivo atópase polo momento en bo estado de conservación, mide 1,6 por 1,7m e ten a particularidade de que se atopa ao carón dun regato, nunha posición non moi diferente da máis coñecida representación rupestre dun navío, tamén en Oia: o coñecido petróglifo de Auga dos Cebros. "O gravado do barco ten uns surcos moi pronunciados qeu o fan visible a simple vista, mesmo con luz difusa. É unha carácterística que chama a atención dende o primeiro momento xa que as rochas do redor presentan unha meteorización moi forte. Por iso, ou ben o petróglifo foi repicado en tempos máis modernos, ou ben permanecía baixo terra e recentes cambios de fluxo de auga provocaron que quedara ao descuberto".
