Catorce percorridos compoñen a edición 2021 de Monumenta

Logo da súa ausencia durante 2020 pola pandemia, o ciclo Monumenta. Andar con arte, volta neste verán coa súa oitava edición. O secretario xeral de Cultura, Anxo Lorenzo, presentaba o 20 de xullo este programa que combina rutas a pé con propostas culturais. Desta volta, a iniciativa propón catorce percorridos por outras tantas localidades do país entre o 6 de agosto e o 12 de setembro.

Integrada na programación do Xacobeo 21-22, a nova xeira outórgalle un especial protagonismo ás rutas de peregrinación que transcorren polo noso país. Segundo destacou Lorenzo, o ciclo "afonda no apoio á creatividade e á innovación nas políticas culturais relacionadas co patrimonio. Deste xeito incorpóranse ou reforzan a súa presenza a literatura, o cinema, a arte contemporánea, a economía circular, o rural ou a participación social".

Canda ás habituais visitas a elementos patrimoniais, o ciclo mantén os concertos integrados baixo o epígrafe Monumenta Escoita e incorpora Monumenta Circular, un apartado centrado na promoción do comercio local e da sustentabilidade. Outra novidade será o desenvolvemento dunha andaina no Bierzo leonés.

O programa arrinca este 6 de agosto no concello de Pontedeume cunha ruta centrada nos contactos culturais nos camiños marítimos, que desenvolverá polo casco antigo da vila. Outras localidades incluídas na programación son Vimianzo, coa ruta "Peregrinas a Compostela", Ribeira, onde se percorrerá a paisaxe litoral da punta de Corrubedo, o Cebreiro, o Saviñao, cunha ruta centrada nas bágoas de San Lourenzo, Ribas de Sil, cun achegamento á minaría aurífera, ou o Corgo, para coñecer os bosques sagrados de Galicia.

Unha ruta arqueolóxica pola Vía da Prata en Oímbra, outra sobre o pan de San Cristovo de Cea, o Camiño Miñoto Ribeiro en Boborás, os cultos dos penedos en Ponteareas, a Vía Mariana luso-galaica en Cerdedo-Cotobade, ou a conexión entre Carboeiro en Silleda, coa ruta xaponesa de Kumano Kodo e serán as outras propostas da iniciativa. Unha trintena de especialistas en patrimonio cultural e natural acompañarán as persoas participantes e explicarán as historias vencelladas a cada percorrido. Ademais en varias actividades desenvolveranse concertos e se promoverán os produtos locais.