Volven as intervencións arqueolóxicas ao castelo de Portomeiro

Do vindeiro luns 12 de xullo ata o 23 do mesmo mes o castelo de Portomeiro (Val do Dubra) acollerá a súa segunda campaña de escavación arqueolóxica. Será realizada polos arqueólogos do grupo de investigación Síncrisis, da Facultade de Historia da USC, en colaboración coa Deputación da Coruña e a Asociación cultural Larada. Foi precisamente esta entidade quen adquiriu os terreos do castelo trala campaña anterior, e que ata o momento pertencían a un particular. A nova campaña pretende ampliar as zonas intervidas no ano 2020 ademais da "consolidación completa dun edificio para facer do xacemento un lugar visitable e de interese na comarca", segundo manifestou Mario Fernández-Pereiro, director da intervención. O ano pasado os arqueólogos localizaran o que parecían ser dúas épocas para edificio: unha primeira fase, máis inconcreta, de posible época tardoantiga, e outro periodo, ao que pertencen a maior parte das estruturas visibles, situada entre os séculos VIII e IX.