Músicas ao Vivo e Asociación de Gaiteiros reaccionan contra o peche do Estudio 5 da Radio Galega

Fai uns días o comité de empresa da CRTVG alertou de que a empresa pública ía levar a cabo o desmantelamento do Departamento de Produción Propia da Radio Galega (Estudio 5) para a posta en marcha dun estudio multimedia no lugar que agora ocupa esta área. O Estudio 5 é un departamento que deu cobertura, desde a creación da emisora pública, a todas as músicas do país dende o ano 1985 e desde o Comité entenden que "a razón que esgrime a dirección para negar que finiquita o departamento- nada ten que ver con garantir a continuidade das funcións que viña desenvolvendo o icónico negociado que agora desaparece". A súa alerta chegou xa aos colectivos artísticos musicais, máis primeiramente afectados por esta decisión da dirección da CRTVG. Así tanto desde a Asociación de Gaiteiros Galegos (AGG) como desde a de Músicas ao Vivo (MAV) fixeron súa a reclamación do comité e ambos colectivos coinciden ao asegurar que esta decisión é un "grave erro" e ao solicitar unha marcha atrás da decisión por parte da dirección do ente público galego "que pon fin a un servizo público valiosísimo que deu e da cobertura ás músicas do país", din desde AGG. Pola súa banda en MAV inciden tamén "na necesidade de incluír na grella programas especializados en música, con cabida para todas os estilos e niveis".

Como lembran desde o seu comunicado os representantes dos traballadores, este departamento, "liderado polo recoñecido produtor de son Pablo Barreiro, fixeron nestas décadas rexistros sonoros que son alicerce fundamental para a historia da música galega, desde orquestras sinfónicas, bandas de música, grupos de rock, tradicionais, concertistas ou intérpretes, ata escolas municipais ou as máis humildes agrupacións", ademais sinalan o labor feito pola equipa deste departamento tamén fóra dos límites das instalacións da propia radio, "as unidades móbiles deste departamento e o excepcional equipamento técnico do Estudio 5 puxéronse ao servizo das nosas músicas para sacar adiante unha misión que, se ben non sempre contou co apoio das sucesivas direccións, conseguiu un alto recoñecemento externo, ben en forma de importantes galardóns, ben a través dalgúns dos índices de audiencia máis elevados na historia da Radio Galega". O comité urxe ao sector cultural e á cidadanía no seu conxunto a "reaxir fronte este novo ataque ao público e ás manifestacións culturais do país, chamando a emprender canta iniciativa se teña a ben para defender o que é de todos e todas".