Román Rodríguez presenta en Madrid a candidatura da Ribeira Sacra logo do revés do ICOMOS

O Museo do Prado, en Madrid, acolleu na tarde deste 9 de xuño unha presentación da candidatura da Ribeira Sacra a Patrimonio da Humanidade. Este é o primeiro acto público arredor desta proposta logo de que se acordase un "aprazamento estratéxico" da mesma por mor do informe negativo que emitiu o ICOMOS, organismo consultivo da UNESCO. O conselleiro de Cultura, Román Rodríguez, participou do acto no que se presentou tanto a candidatura galega como a dos museos e paseos do Prado e do Retiro, presentada por Madrid ante os embaixadores en España dos estados membros do Comité de Patrimonio Mundial e da Comisión Nacional da UNESCO.

Rodríguez apuntou sobre o acto que "este é o primeiro paso da nova etapa da candidatura ata o si definitivo" da UNESCO, e deu a coñecer á asistencia o traballo técnico e o labor de posta en valor e conservación desta paisaxe cultural ademais de incidir nos valores básicos da mesma. Ademais afirmou que Xunta e Estado mellorarán todo o que sexa preciso para dar o último paso "con toda a forza e conseguir o si definitivo" ao considerar que "a Ribeira Sacra é un espazo único, cun gran valor incapaz de decepcionar a quen o visita, polo que manteremos vixente o compromiso" coa candidatura, sinalou.

Na súa intervención, Rodríguez incidiu especialmente na declaración como Ben de Interese Cultural do territorio así como no desenvolvemento dun órgano de xestión do Plan Ribeira Sacra de investimentos como ferramentas para mellorar a situación da área. Segundo defendeu, "este é un territorio que destaca, precisamente, pola súa capacidade para conservar os seus valores excepcionais e que reflicte a transformación pausada e respectuosa do home sobre a terra", malia a que boa parte das críticas do ICOMOS fan referencia a que as excesivas transformacións da área minaron boa parte dos seus valores diferenciais.