Florencio Delgado Gurriarán suma apoios para o Día das Letras 2022

Hai xa varios anos que diferentes concellos e entidades da comarca de Valdeorras promoven a candidatura de Florencio Delgado Gurriarán como homenaxeado para o Día das Letras Galegas. A proposta está a coller neste 2021 un novo impulso e deste xeito, o pleno do Concello do Barco aprobou o pasado 3 de xuño a solicitude de que a RAG recoñeza este autor. Tamén a Asociación Empresarial de Valdeorras e a asociación Centro Comercial Aberto (CCA) O Barco están a se implicar na iniciativa e colocaron cartelería polas rúas da vila a apoiar a candidatura, mentres en Vilamartín de Valdeorras un mural lembra desde maio o autor.


As diferentes entidades que promoven esta candidatura anunciaron que, alén da mobilización social, van enviar á Real Academia Galega documentación para que se tome en conta a proposta de xeito oficial. A candidatura deberá conseguir o apoio dun mínimo de tres membros da RAG para que o pleno da entidade a tome en conta.

A través do web As Letras de Florencio, está a se promover unha campaña social de apoio á proposta, na que se chama á poboación local a que envíe vídeos ou fotografías a reclamar este recoñecemento, ademais de recoller cartas a prol da proposta da man de diferentes nomes da cultura do país.

Desde 2017 os gobernos locais da comarca (Barco, Carballeda, Rubiá, Vilamartín, A Rúa, Petín, Larouco, A Veiga e O Bolo) co apoio da Deputación de Ourense e entidades culturais traballan integrados na Irmandade de Florencio en desenvolver esta candidatura coa celebración de diferentes eventos e campañas ou a convocatoria de certames literarios, co obxectivo de crear unha fundación en lembranza do seu ilustre veciño.

Delgado Gurriarán destaca pola súa obra poética, con catro títulos, e ensaística, con múltiples colaboracións en prensa. Foi membro correspondente da Real Academia Galega desde o seu exilio en México, onde participou da creación da revista Vieiros.