O Sorriso de Daniel chama a corrixir deficiencias da candidatura da Ribeira Sacra á UNESCO

A Asociación O Sorriso de Daniel publicou no seu web unha reflexións encol do adiamento para presentar a candidatura da Ribeira Sacra a Patrimonio da Humanidade. O colectivo denuncia que esta "é unha moi mala nova que nos debe facer reflexionar sobre como se xestou a candidatura e como se levou adiante a mesma". Ao seu ver, este foi un traballo "incompleto e falto de rigor que merecía o maior dos esforzos e que sen embargo se tramitou como un expediente máis sen prestarlle a importancia que se lle debía dar".

Para este colectivo, centrado na divulgación e defensa da arte románica no noso país, "a Consellería de Cultura, impulsora da candidatura debería facer unha profunda autocrítica para saber cales foron as razóns para chegar a esta situación e quen son os responsables últimos". De xeito máis concreto, denuncia, que "unha das debilidades da candidatura era a falta de visibilización da implicación cidadá" xa que "non houbo nunca escoita activa por parte da Consellería" con colectivos que traballan no territorio e consideran que "isto foi en detrimento da Candidatura". No Sorriso de Daniel apuntan finalmente a posibilidade de que interferise "nesta decisión de retirar a candidatura o feito de que coincidise en tempo coa dos Museos madrileños de El Prado, Reina Sofia e Thyssen Bornemisza e que a retirada da Ribeira Sacra lle deixa o camiño mais despexado para estoutra candidatura".

Pola súa banda, o Conselleiro de Cultura, Román Rodríguez, reuniuse este 5 de xuño nos Peares con alcaldes e representantes dos concellos que forman o territorio, un encontro no que asegurou que a proposta "sairá reforzada" deste aprazamento. O goberno galego, segundo el, aproveitará a situación "para tomar impulso e avanzar, con paso aínda máis firme, cara ao si definitivo".

Rodríguez destacou que a Xunta mantén os investimentos previstos neste territorio, aos que, engadiu, "complementaranse co proxecto que a Administración autonómica presentou aos fondos europeos Next Generation para actuar sobre este territorio e impulsar a recuperación de espazos de alto interese patrimonial que estean deteriorados nos vindeiros anos". Pendente de concretar, a intención do Goberno Galego é obter 40 millóns máis de fondos de investimento para a zona.