As librarías galegas están a recibir dous novos lanzamentos de BD galega realizados por autores que comezaron a súa carreira nos anos 80. Fausto Isorna acaba de presentar Camiño de Santiago. A aventura xacobea de Simón Martel. Publicada por El Patito Editorial co apoio de Turismo de Galicia e da Secretaría Xeral de Política Lingüística a obra retoma a protagonista da que se reivindica como a serie de BD con máis títulos publicada no noso país. Desta volta Martel enfróntanse aos desafíos que atopa durante a súa peregrinación a Compostela, a seguir a súa proposta para todos os públicos inspirada nos clásicos da BD francobelga.
Pola súa banda, Demo Editorial recupera o histórico Víctor Tizón, nome habitual dos fanzines da Movida viguesa, que asina O pexego mecánico. Esta obra, chea de humor negro, preséntase como "fresca, transgresora, reflexiva sobre a vida e a morte, con diálogos delirantes e un humor surrealista que agocha un fondo filosófico de apariencia underground. É o suicidio unha porta de saída? Ou é quizáis unha porta de entrada? Será que é unha porta xiratoria? Abrídea e comprobádeo vós mesm@s", adianta a editora.
