Fundación Rosalía e Museo do Pobo reivindican a apertura ao público do Panteón de Galegos Ilustres

O 25 de maio de 1891 exhumábanse os restos de Rosalía de Castro do cemiterio de Adina en Padrón e se trasladaban á Igrexa de San Domingos de Bonaval, en Santiago de Compostela. Esta homenaxe inaugurou o Panteón de Galegos Ilustres, que se localizou nunha das capelas do templo nun mausoleo creado con este propósito polo escultor Jesús Landeira. A Fundación Rosalía de Castro e mais o Museo do Pobo Galego conmemoraron na mañá deste día 25 cun acto os 130 anos do traslado dos restos da poeta, un evento que, segundo destacaron representantes das dúas entidades "iniciou a consagración de Rosalía como emblema nacional".

No evento, Justo Beramendi, presidente do Museo, e Anxo Angueira, responsable da Fundación, reivindicaron o acceso público ao Panteón de Galegos Ilustres, actualmente limitado a datas concretas logo da sentenza que recoñeceu a propiedade da Igrexa sobre o templo. Os voceiros destas entidades reclamaron o desbloqueo da Proposta de Lei do Panteón de Galicia que, por iniciativa do Museo do Pobo Galego, presentou o Consello da Cultura Galega en 2011 consensuada con institucións como a Real Academia Galega, a Fundación Alfredo Brañas, a Fundación Castelao ou a propia Fundación Rosalía. No acto lembrouse que o Panteón, "é un símbolo da identidade galega" que acolle tamén os restos de Daniel Rodríguez Castelao, Domingos Fontán, Alfredo Brañas, Ramón Cabanillas ou Francisco Asorei.

A translación dos restos de Rosalía que abriu este espazo desenvolveuse por iniciativa da Sociedade Económica de Amigos do País de Santiago, o Concello de Santiago de Compostela, a Asociación Rexionalista Galega e un grupo de estudantes da Facultade de Dereito da Universidade. A acción desenvolveuse co consentimento de Manuel Murguía e da familia de Rosalía de Castro.