Os centros galegos abordan o Día dos Museos con múltiples actividades

Baixo o lema "O futuro dos museos, recuperar e imaxinar", centros de todo o país celebran este 18 de maio o Día Internacional do Museos. As actividades, que se prolongan en moitos casos ao longo de toda a semana, enchen espazos de todo o país. A Xunta de Galicia anuncia unha trintena de propostas nos centros que dependen da Consellería de Cultura co "foco na progresiva incorporación e transformación dixital nos museos galegos". Un acto institucional no Centro de Arte Contemporánea de Galicia (CGAC) este mesmo día 18 que foi o centro da conmemoración. No mesmo, Román Rodríguez, titular do departamento anunciou que a candidatura galega aos fondos Next Generation para a recuperación da crise provocada pola Covid-19 incluirá un proxecto de dez millóns de euros para estes centros ao longo dos vindeiros tres anos orientado a conseguir "museos máis innovadores, dixitais, sustentables e eficientes".

Visitas guiadas, audioguías emocionais, un concerto e mais o espectáculo teatral Manuela é unha inuit, de Sr. López Producións son as propostas que desenvolverá o Museo de Belas Artes da Coruña. O Museo das Peregrinacións e de Santiago acolle un concerto de Abraham Cupeiro, mentres o Centro Galego de Arte Contemporánea programa o obradoiro en liña Escoita profunda un ciclo de proxeccións arredor de Pauline Oliveros e, o sábado 22, unha ruta arqueolóxica por Santiago de Compostela. O Museo da Cidade da Cultura contará con visitas guiadas á exposición Faraón e proxectará a peza Formas da Aparencia de Verónica Vicente.

A narración oral de Quico Cadaval e mais obradoiros didácticos compoñen a oferta do Museo Arqueolóxico Provincial para esta celebración, mentres o do Castro de Viladonga achegará un concerto en liña de Germán Díaz. Pola súa banda, o Museo de Pontevedra organizou unha intervención artística colectiva que comezará con Itziar Ezquieta, Begoña Paz, María Paz, María Covadonga e Laura Otero e que se abrirá despois a toda a cidadanía. Concertos de Laura Lamontagne e de María Domínguez Pérez son outras iniciativas da celebración.

No Museo do Pobo a data conmemórase cun encontro de responsables destes centros do país a debater a situación derivada da pandemia, un espectáculo de títeres e visitas comentadas á exposición Ons Soa. En Vigo, o MARCO desenvolve visitas guiadas á exposición 4 Proxectos e obradoiros para público infantil e adulto.