O Parlamento pídelle a Xunta a defensa do carácter patrimonial dos bens mobles de Meirás

A Comisión 1ª do Parlamento de Galicia, aprobou onte por unanimidade con modificacións a proposta do Grupo Parlamentario do Bloque Nacionalista Galego sobre a demanda que debe realizar o Goberno galego ao Goberno central e as actuacións que debe levar a cabo en relación cos bens mobles do pazo de Meirás. Os tres grupos con representación popular no Parlamento de Galicia instan a Xunta de Galicia a defender a "incoación de maneira urxente do procedemento para a inclusión no BIC dos bens mobles que pola súa vinculación co inmoble forman parte inseparable del, e aplicación provisional a estes bens mobles do réxime de protección previsto para os bens de interese cultural", así como a demandar da administración xeral do Estado que se interpoñan as accións xudiciais pertinentes para defender a titularidade pública deses bens, "que son necesarios para explicar a súa historia, que son parte integrante e inseparable do conxunto, e que son de titularidade ou de dominio público".

Os representantes da cidadanía instan así mesmo á Xunta a traballar conxuntamente coa administración xeral do Estado na adopción de todas as medidas previstas na lexislación, incluíndo medidas cautelares e urxentes, para garantir a unidade e integridade dos bens e "para impedir un novo saqueo de bens que foron resultado do espolio franquista. E, neste sentido, advertir á familia Franco da imposibilidade de sacar de Meirás todos aqueles bens que non sexan os obxectos e utensilios de uso estritamente persoal e privado". O Parlamento insta ao goberno galego a "levar a cabo as accións pertinentes para que os bens cunha declaración específica de BIC, as Estatuas do Mestre Mateo e a Biblioteca de Emilia Pardo, se manteñan en Galicia, en resposta ao sentir xeneralizado da sociedade galega."

O Concello da Coruña tamén
Na mesma liña desde o Concello da Coruña a alcaldesa, Inés Rey, anunciou que o consistorio recorrerá contra a dilixencia xudicial do pazo de Meirás, en que se lle dá vía libre á familia Franco para que retire os bens do seu interior: "Colaboraremos coa avogacía do Estado en todo o que faga falta e coa documentación pertinente que certifique que o patrimonio interior do pazo pertence, igual que o edificio, a todas e todos os galegos". A rexedora asegurou que "respectamos as posicións procesuais de todas as partes, pero o noso compromiso é firme" e puntualizou que está constatado que os Franco usurparon no seu momento unha propiedade pública coa lexitimidade dun réxime autoritario e que esa propiedade conta hoxe en día con obxectos de gran valor.