Ir Indo publica unha biografía de Xela Arias

Anxo Xoán Rajó Pazos asina a biografía da homenaxeada no Día das Letras que acaba de presentar a editorial Ir Indo. Xela Arias, poeta e tradutora é o título deste traballo que repasa a vida e a obra da autora a incluír unha cronobiografía e fotografías nalgúns casos inéditas. O autor, que coincidiu con Arias na facultade, elaborou unha publicación orientada en particular para o estudantando de secundaria que aborda de xeito didáctico o percurso vital e as inquedanzas da protagonista.

En paralelo, Daniel Chapela coordinou o fanzine Xela Arias. Poeta nas marxes. Esta publicación monográfica recolle diferentes voces que abordan a obra da autora. María Xesús Nogueira, Susana Trigo, Ana Romaní, Marga do Val, Manuel Bragado ou o propio Daniel Chapela abordan cuestións como o traballo editorial, a acollida da obra de arias ou as súas claves estéticas neste volume. Ademais, inclúese unha antoloxía de poemas da homenaxeada este 17 de maio.