O Auditorio Mar de Vigo acollerá o vindeiro 16 de maio o Concerto das Letras que organizan o Consello da Cultura Galega e mais o concello olívico. Laura LaMontagne e PicoAmperio protagonizan esta proposta na que integrarán a súa música con versos de Xela Arias, homenaxeada no Día das Letras Galegas deste 2021. O Concello de Vigo acollía na mañá deste 29 de abril a presentación do evento. Durante a mesma o alcalde, Abel Caballero, lembrou a vinculación da poeta coa cidade e anunciou que lle dedicará unha rúa.
Segundo explicou LaMontagne "no concerto estruturamos o noso repertorio a pór no centro a creación de Xela Arias, vémolo como a nosa achega a todo o que se está xerar este ano arredor do seu traballo. No noso caso propomos tres bloques a nos basear nos poemarios Denuncia do equilibro e Tigres coma cabalos. Abordamos este material en forma de colaxe, a coller un pouco de cada cousa e establecer relacións entre poemas con varias pezas musicadas entrelazadas".
Para alén da asistencia presencial, o concerto poderá seguirse vía streaming polo web do Consello da Cultura e mais o da CRTVG, que tamén emitirá este recital no propio día 17 de maio pola súa segunda canle de televisión. As reservas para acudir ao evento poden facerse na plataforma Teuticket desde o web do Consello da Cultura.
