O emblemático Boletín Auriense entra na rede no seu cincuenta aniversario

O Boletín Auriense é unha das publicacións imprescindibles para coñecer a investigación histórica e arqueolóxica de Galicia, especialmente a xurdida nas últimas décadas. Comezou a ser editada polo Museo Arqueolóxico Provincial de Ourense en 1971, e nela recóllese unha boa parte dos achados e investigacións sobre o pasado da provincia ata se converter nunha referencia indispensable para a investigación. Por desgraza, ata o momento os seus valiosos números, nos que colaboraron destacadas figuras como Xesús Ferro Couselo, Xaquín Lorenzo ou Ramón Otero Pedrayo entre moitos outros, aínda non están dispoñibles na rede. Pero co motivo deste Día do Libro, e para conmemorar os 50 anos da publicación, o Museo Arqueolóxico Provincial decidiu facer accesible en pdf o primeiro número. Alí publicouse o achado dunha das pezas arqueolóxicas emblemáticas de Galicia para coñecer o proceso de integración do noroeste ibérico no Imperio Romano, a "tessera hospitalis" de Castromao, vanse presentar investigacións sobre a arte ourensá e recollidas de folclore sobre bruxas.