A celebración do Día das Artes Galegas, que este 1 de abril lembrou o arquitecto barroco Domingo de Andrade, deu nestes días en diferentes actividades e contidos sobre este creador. Deste xeito, a Academia Galega de Belas Artes realizou unha homenaxe na Catedral de Santiago, onde está enterrado o arquitecto. Unha placa e diferentes intervencións reivindicaron a figura á que se homenaxeou en 2020 e que tivo prorrogada a súa celebración a este 2021 por mor da pandemia de Covid-19.
Pola súa banda, a Fundación Compostela Arquitectura presentou o vídeo Os segredos da escaleira de Bonaval, unha peza que repasa, da man da arquitectura ou as matemáticas e a recoller infografías e planos orixinais as peculiaridades da que está considerada unha obra mestra deste autor.
O web do Consello da Cultura Galega, a coincidir coa data, ampliou tamén o especial que xa lle dedicara ao arquitecto en 2020. Desta volta, o investigador e profesor da USC Alfredo Vigo Trasancos repasa cinco pezas da arquitectura civil do autor. Estes súmanse aos 5 edificios relixiosos que xa escollera no pasado ano, xeolocalizados e comentados.
