A Sala Numax presenta un proxecto de correspondencias artísticas con Xela Arias

Intemperiadas, correspondencias interartes con Xela Arias é o nome do proxecto co que a sala Numax celebrará o Día das Letras de 2021. A iniciativa, que se presentaba este 29 de marzo, desenvolverase entre abril e outubro deste ano e propón unha serie de diálogos entre novas artistas e a poeta que é homenaxeada este 17 de maio. O proxecto, que comisaría Charo Lopes "ten como alicerce activar a pegada de Xela Arias: a sororidade instintiva, a desobediencia fronte un equilibrio inxusto, a creatividade e a experimentación coa palabra" e conta co apoio da Deputación da Coruña.

Ao longo dos meses en que se desenvolve o proxecto, artistas de diferentes ámbitos desenvolverán parte do seu proceso creativo ao vivo no propio espazo da libraría durante o horario de apertura. Laura Tova, desde a ilustración, bota a andar a iniciativa este 10 de abril. A ela seguirana Io Morales (téxtil), Jóia Rara [Acacia Ojea e Marga Gilino] (música), Verónica Vicente (fotografía), e Paula Pereira (cerámica). Ademais, promoverase, co cancelo #intemperiadas que toda a xente comparta polas redes sociais as súas propias creacións arredor de Xela Arias.

En paralelo, a editora Chan da Pólvora acaba de lanzar De certo, a vida ía en serio, un volume que, a partir de textos de entrevistas, conferencias, reflexións, autopoéticas e poemas, quere explicar a Arias a través das súas propias palabras. Maria Xesus Nogueira foi a responsable da selección de textos e da edición do volume.