Concellos de ata 50.000 habitantes e entidades sen fin de lucro teñen aberto o prazo para acceder ás axudas que a Deputación de Pontevedra convoca para actividades de dinamización da lingua. O programa para asociacións, dotado con 120.000 euros, cobre o desenvolvemento de "certames literarios e xornalísticos, creación audiovisual e literaria, feiras e eventos que promovan a creación" na nosa lingua, "estudos e publicacións sobre sociolingüística, xornadas e publicacións de recuperación da toponimia", propostas que conmemoren "o Día das Letras Galegas ou que recoñezan o labor de persoas ou colectivos que aposten polo galego" ou publicación de "documentación permanente, creativa ou publicitaria; revistas en papel e en formato electrónico, vocabularios, manuais; recursos para o lecer e xogos en galego, páxinas web; e outros" "que teñan como fin introducir ou estender o uso da lingua nalgún eido", ademais de campañas a prol do fomento do galego. No caso dos concellos, o orzamento dedicado a esta liña é de 100.000 euros para desenvolver propostas como as listadas. Nas dúas convocatorias o prazo para as solicitudes está aberto ata o vindeiro 15 de abril.
