Abre en Sarria unha exposición dedicada á infancia de Xela Arias

Este catro de marzo, a coincidir co 59 aniversario do nacemento de Xela Arias, inaugurábase a exposición Aquela nena de Sarria. Galicia Dixital e o Colectivo Egeria coordinaron, co apoio da Consellería de Cultura, esta iniciativa que reflicte en doce paneis "o tempo sarrián e lucense de Xela Arias, a súa querenza por Sarria e o rural, o seu vencello co idioma galego e o empeño en que se recoñecese Xela como o seu nome real", segundo recolle a Secretaría Xeral de Política Lingüística. A mostra recolle fotografías familiares e poemas dedicados á autora.

O secretario Xeral de Política Lingüística destacou que, coa inauguración do proxecto "celebramos unha das voces máis destacadas da poesía galega contemporánea, poeta singular, transgresora e guía de toda unha xeración poética renovadora da poesía galega en temas, estilo e forma", e lembrou que a mostra bota a andar as celebracións oficiais do Día da Letras dedicado á autora. A exposición poderá visitarse en Sarria ata o 15 de marzo e percorrerá despois diferentes centros educativos. Ademais, está dispoñible de xeito íntegro no Portal da Lingua Galega.