Duplícase a participación no Concurso de Microrrelatos da RAG

O IVº Concurso de Microrrelatos da Real Academia Galega e PuntoGal ven de dar un salto cuantitativo importante ao recibir na fin do prazo de presentación máis do dobre de relatos que na pasada edición. Co reconto xa feito tras do remate da convocatoria este domingo 28 de febreiro a Academia sinala ter recibido máis de 1.500 pezas entre as tres modalidades, o dobre có ano pasado no que se presentaron 750 relatos. En concreto, segundo a RAG, na categoría de adultos recibíronse máis de 700 contos; na xuvenil, preto de 500 e na infantil, uns 300. Os xurados, que están constituídos por membros propostos polas tres entidades que participan na creación deste certame,RAG, PuntoGal e a revista Luzes, elixirá os tres mellores textos de cada categoría que serán públicos despois de Semana Santa.

Promover o galego en vídeos de móbil
Outra institución da lingua galega que se lanza a incentivar o uso do idioma a través dun concurso de micro-obras é o Instituto da Lingua Galega, que neste ano conmemora o seu 50 aniversario. Con esta efeméride o ILG pon en marcha, entre outras actividades, o concurso de vídeo Móvete, destinado ao estudantado dos institutos de Galicia e das zonas de fala galega fóra de Galicia. O certame premiará vídeos inéditos e orixinais de ata 2 minutos de duración, que poden estar feitos con teléfonos móbiles e 300 MB de tamaño co temas de base 'Móvete co galego', 'Conmóvete co galego' e 'Promove o galego'. Está dirixido a alumnado que estea cursando 3º, 4º da ESO, 1º ou 2º de Bacharelato e pódese participar en dúas modalidades, individual e en grupo. Os vídeos serán difundidos a través das contas de Instagram e Twitter do ILG e a través da súa canle de YouTube, e a peza que obteña unha maior puntuación de acordo coas interaccións a que dea lugar ao longo de todo o concurso recibirá como premio unha tableta. O xurado elixirá un máximo de tres persoas e tres grupos finalistas por tema, e un gañador por cada un dos temas, tanto na modalidade individual coma na de grupo. Se as circunstancias o permiten, celebrarase un acto de entrega de premios onde se proxectarán os vídeos finalistas e se darán a coñecer os gañadores.