Unha xornada de Galix diagnostica a situación do libro infantil e xuvenil

O peso do libro infantil e xuvenil no sistema editorial galego, e a presenza de disciplinas como o teatro e a banda deseñada dirixidas para eses mesmos públicos centran a análise da nova xornada de Galix, a Asociación galega do libro infantil e xuvenil que se celebrará hoxe luns pola tarde, a partir das 16 horas, transmitida en directo polo web do Consello da Cultura Galega. "Interesa dar a coñecer as fortalezas do libro infantil e apoiar aqueles xéneros que poden precisar dalgunha acción positiva", sinalan desde a organización. Entre os participantes, Manuel Bragado analizará o peso actual do libro infantil e xuvenil dentro do sistema literario galego, Chus Fernández explorará a situación actual do libro infantoxuvenil en Galicia e Xosé Ballesteros presentará a problemática dos libros informativos. O achegamento a outras disciplinas próximas será da man de Cándido Pazó, sobre o teatro, e Kiko da Silva, sobre a banda deseñada.