A Coruña aproba a súa ordenanza de uso do galego

Era a última cidade do país que carecía desta norma

O Pleno do Concello da Coruña aprobou este 4 de febreiro a súa Ordenanza para o uso da lingua galega. Co único voto en contra do grupo municipal do PP, a iniciativa promove a utilización da nosa lingua "en todas as accións e actuacións, na documentación, na comunicación social e nas relacións coa cidadanía e con todas as entidades situadas en Galicia" por parte da cámara municipal. A Coruña era a última da cidades galegas que carecía desta ordenanza, que establecera como obrigatoria a Lei de uso do galego nas administracións locais de 1988.

O texto, segundo informa o concello, "recolle que a veciñanza poderá elixir entre o galego ou o castelán para se dirixir a calquera unidade administrativa local e terá dereito tamén a ser atendida e a obter ou recibir a documentación e as notificacións municipais na lingua que escolla" aínda que a administración empregará por defecto o galego "nas comunicacións internas, na cartelería e na proxección pública". Ademais do propio concello, os organismos dependentes, como "entes asociados, padroados, organismos autónomos, sociedades, fundacións, centros de formación, museos, arquivos, Bibliotecas Municipais e Escolas Infantís Municipais" rexeranse por esta ordenanza.