O presidente da Xunta, Alberte Núñez Feijóo, anunciaba este 25 de xaneiro as novas restricións que se aplicarán no conxunto do país ao longo das vindeiras tres semanas para tentar controlar a pandemia de Covid-19. Logo de atender as propostas do comité clínico organizado para asesoralo, o executivo acordou, entre outras medidas, fechar museos, centros culturais e todo tipo de espectáculos. Ademais, o comercio non esencial, que inclúe librarías, tendas de discos e outros establecementos de carácter cultural, terá ás 18 horas o seu horario máximo de feche. As medidas anunciadas, que se publicarán no Diario Oficial de Galicia con máis detalle no día 26, estarán en vigor en principio ata o vindeiro 16 de febreiro.
As medidas determinan tamén que as universidades non retomarán as clases ata o 8 de febreiro e que estas non poderán ser presenciais antes do día 17. Con carácter xeral, prohíbense as xuntanzas de persoas non convivintes en todo o territorio.
