A Semana do Libro de Compostela espállase pola cidade na súa cuarta edición

"Unha aposta pola literatura de quilómetro cero", así definiu Lola Puerta, representante dos libreiros composteláns, a cuarta edición da Semana do Libro de Compostela (SELIC). O concello acollía na mañá deste 7 de outubro a presentación dun encontro que muda a súa localización na Praza da Quintana e se espalla por diferentes espazos da cidade. Deste xeito, entre o 10 e o 18 deste mes serán a sede de Afundación na Rúa do Vilar e mais o comedor do Pazo de Fonseca os que acollan os dezaseis expositores desta xeira, mentres as actividades desenvolveranse en diferentes lugares como a Fundación Torrente Ballester, o Hotel Compostela, a Fundación Eugenio Granell ou a lavandaría da Rúa Hortas.

Segundo explicou Quique Alvarellos, representante dos editores no evento "trátase dunha SELIC adaptada, non pequena", se ben a organización recoñeceu unha menor presenza de autores foráneos por mor da situación sanitaria, que levou tamén a tirarlle peso ás sesións de sinaturas e a limitar a capacidade dos actos previstos.

Ata unha ducia de roteiros como os dedicados a Carballo Caleiro, á Compostela da República, á presenza da cidade no teatro, a Federico García Lorca, ás Irmandades da Fala ou a Isaac Díaz Pardo fan parte do programa, que inclúe ademais oito presentacións, tres sesións de sinaturas, oito actuacións, sete coloquios e dúas exposicións. Entre os autores que participan do evento están Ledicia Costas, Xosé Carlos Carracedo Porto, María Eiras, Antón Riveiro Coello ou Rosalía Fernández Rial.

Pola súa banda, as restricións ás que se está sometida a cidade de Ourense por mor da situación sanitaria levaron a que por vez primeira a Feira do Libro, prevista para esta semana, pase a formato virtual. Deste xeito, a partir deste 7 de outubro, as redes sociais da Federación de Librarías de Galicia acollerán retransmisións das actividades do programa, mentres que serán as librarías da cidade os espazos nos que se poderán adquirir títulos. Nesta primeira xornada desenvolveranse, a partir das 18 horas, presentacións a cargo de Marcos Viso, Arancha Nogueira e Carlos da Aira. As actividades continuarán ata o vindeiro día 10 cun total de 23 presentacións previstas.

***Actualizado ás 15:30***